sahil pe kya hai bahar ke andar talash kar

sāhil pe kyā hai bahar ke andar talāsh kar

gahrā.iyoñ meñ Duub ke gauhar talāsh kar

jis meñ hayāt-baḳhsh nazārā dikhā.ī de

gulzār-e-zindagī meñ vo manzar talāsh kar

dete haiñ ab sadā tujhe mirrīḳh o māhtāb

kyā kyā haiñ un kī god meñ jā kar talāsh kar

miT jaa.e jis ke nuur se zulmat hayāt kī

aisā koī charāġh-e-munavvar talāsh kar

tūfān-e-bahar-e-zīst meñ kashtī na ġharq ho

ai nāḳhudā panāh kā lañgar talāsh kar

jis dā.ere meñ dauḌ lagātā rahā hai tū

us dā.ere ke daur kā mehvar talāsh kar

'kausar' ho tujh ko ḳhud se jo milne kī aarzū

apne ko apne aap meñ kho kar talāsh kar

sahil pe kya hai bahar ke andar talash kar

gahraiyon mein Dub ke gauhar talash kar

jis mein hayat-baKHsh nazara dikhai de

gulzar-e-zindagi mein wo manzar talash kar

dete hain ab sada tujhe mirriKH o mahtab

kya kya hain un ki god mein ja kar talash kar

miT jae jis ke nur se zulmat hayat ki

aisa koi charagh-e-munawwar talash kar

tufan-e-bahar-e-zist mein kashti na gharq ho

ai naKHuda panah ka langar talash kar

jis daere mein dauD lagata raha hai tu

us daere ke daur ka mehwar talash kar

'kausar' ho tujh ko KHud se jo milne ki aarzu

apne ko apne aap mein kho kar talash kar