sahilon ki KHamushi ne jab fasurda kar diya

sāhiloñ kī ḳhāmushī ne jab fasurda kar diyā

ḳhvāhishoñ kī kashtiyoñ ko ġharq-e-dariyā kar diyā

jism kyā thā lazzatoñ kā ek dariyā thā kabhī

har kisī ne pī ke jis ko aaj sahrā kar diyā

aaj baiThe tak rahe haiñ umr kā ḳhālī gilās

mausamoñ kā mai-kada ye kis ne suunā kar diyā

maiñ barahna jism us kā oḌh kar phirtā rahā

jāma-poshī ke junūñ ne mujh ko nañgā kar diyā

thā yaqīnan dostoñ kī saf meñ ik dushman mirā

be ḳhabar pā kar achānak jis ne hamla kar diyā

soch kī saarī basīrat chhīnñe vaale batā

tū to sūraj thā mirā kyuuñ mujh ko andhā kar diyā

vo jo kal tak māñgte the mujh se qad merā 'adīb'

sher ke nāqid ne un ko mujh se ūñchā kar diyā

sahilon ki KHamushi ne jab fasurda kar diya

KHwahishon ki kashtiyon ko gharq-e-dariya kar diya

jism kya tha lazzaton ka ek dariya tha kabhi

har kisi ne pi ke jis ko aaj sahra kar diya

aaj baiThe tak rahe hain umr ka KHali gilas

mausamon ka mai-kada ye kis ne suna kar diya

main barahna jism us ka oDh kar phirta raha

jama-poshi ke junun ne mujh ko nanga kar diya

tha yaqinan doston ki saf mein ek dushman mera

be KHabar pa kar achanak jis ne hamla kar diya

soch ki sari basirat chhinne wale bata

tu to suraj tha mera kyun mujh ko andha kar diya

wo jo kal tak mangte the mujh se qad mera 'adib'

sher ke naqid ne un ko mujh se uncha kar diya