samne ho kar bhi kab sab par ayan hote hain log

sāmne ho kar bhī kab sab par 'ayāñ hote haiñ log

jo nazar aate haiñ vaise hī kahāñ hote haiñ log

chhāp se māhaul kī bachnā bahut dushvār hai

apne gird-o-pesh hī ke tarjumāñ hote haiñ log

pastiyoñ meñ bhī nazar aate haiñ 'azmat ke nishāñ

ḳhaak par rahte hue bhī āsmāñ hote haiñ log

qāfila sālār jab hote haiñ uf vo sā.ateñ

haa.e vo lamha ki jab be-kārvāñ hote haiñ log

zulm par bāñdheñ kamar to al-amān-o-al-hafīz

misl-e-chañgez ik balā-e-be-amāñ hote haiñ log

mehrbāñ ho jaa.eñ to ranj-o-alam kī dhuup meñ

peḌ kī sūrat ghanerā sā.ebāñ hote haiñ log

naqsh-e-pā tak bhī nahīñ milte kahīñ un ke 'na'īm'

dekhte hī dekhte yuuñ be-nishāñ hote haiñ log

samne ho kar bhi kab sab par 'ayan hote hain log

jo nazar aate hain waise hi kahan hote hain log

chhap se mahaul ki bachna bahut dushwar hai

apne gird-o-pesh hi ke tarjuman hote hain log

pastiyon mein bhi nazar aate hain 'azmat ke nishan

KHak par rahte hue bhi aasman hote hain log

qafila salar jab hote hain uf wo saaten

hae wo lamha ki jab be-karwan hote hain log

zulm par bandhen kamar to al-aman-o-al-hafiz

misl-e-changez ek bala-e-be-aman hote hain log

mehrban ho jaen to ranj-o-alam ki dhup mein

peD ki surat ghanera saeban hote hain log

naqsh-e-pa tak bhi nahin milte kahin un ke 'na'im'

dekhte hi dekhte yun be-nishan hote hain log