samne rah kar na hona masala mera bhi hai
sāmne rah kar na honā mas.ala merā bhī hai
is kahānī meñ izāfī tazkira merā bhī hai
be-sabab āvārgī masrūf rakhtī hai mujhe
raat din bekār phirnā mashġhala merā bhī hai
baat kar farhād se bhī intihā-e-ishq par
mashvara mujh se bhī kar kuchh tajraba merā bhī hai
kyā zarūrī hai añdhere meñ tirā tanhā safar
jis pe chalnā hai tujhe vo rāsta merā bhī hai
hai koī jis kī lagan gardish meñ rakhtī hai mujhe
ek nukte kī kashish se dā.era merā bhī hai
be-sabab ye raqs hai merā bhī apne sāmne
aks vahshat hai mujhe bhī aa.ina merā bhī hai
ek gum-karda galī meñ ek nā-maujūd ghar
kūcha-e-ushshāq meñ 'āsim' pata merā bhī hai
samne rah kar na hona masala mera bhi hai
is kahani mein izafi tazkira mera bhi hai
be-sabab aawargi masruf rakhti hai mujhe
raat din bekar phirna mashghala mera bhi hai
baat kar farhad se bhi intiha-e-ishq par
mashwara mujh se bhi kar kuchh tajraba mera bhi hai
kya zaruri hai andhere mein tera tanha safar
jis pe chalna hai tujhe wo rasta mera bhi hai
hai koi jis ki lagan gardish mein rakhti hai mujhe
ek nukte ki kashish se daera mera bhi hai
be-sabab ye raqs hai mera bhi apne samne
aks wahshat hai mujhe bhi aaina mera bhi hai
ek gum-karda gali mein ek na-maujud ghar
kucha-e-ushshaq mein 'asim' pata mera bhi hai
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
