samne se jab guzar jate hain aap

sāmne se jab guzar jaate haiñ aap

ham pe ik jaadū sā kar jaate haiñ aap

barhamī se to nikhar jaate haiñ aap

aur bhī dil meñ utar jaate haiñ aap

ham pe jo guzre vo gintī meñ nahīñ

be-niyāzī se guzar jaate haiñ aap

dekhiye suniye zarā ruk jā.iye

chhoḌ kar ham ko kidhar jaate haiñ aap

dard-e-dil kā kuchh to darmāñ kījiye

dard hai dil meñ magar jaate haiñ aap

dil-navāzī aap kī fitrat nahīñ

kis liye dil toḌ kar jaate haiñ aap

kis qadar vīrān hai duniyā-e-dil

aah is se be-ḳhabar jaate haiñ aap

ham bhī haiñ chashm-e-karam ke muntazir

kyoñ nigāheñ pher kar jaate haiñ aap

chalte chalte kis par aa jaatā hai rahm

jaate jaate kyoñ Thahar jaate haiñ aap

log jo kahte haiñ vo kahte raheñ

kyoñ kisī kī baat par jaate haiñ aap

ishq to hai raunaq-e-bazm-e-hayāt

ishq se kyoñ itnā Dar jaate haiñ aap

ye muqaddar kā karam hai ai 'bahār'

chaah se pyāse agar jaate haiñ aap

samne se jab guzar jate hain aap

hum pe ek jadu sa kar jate hain aap

barhami se to nikhar jate hain aap

aur bhi dil mein utar jate hain aap

hum pe jo guzre wo ginti mein nahin

be-niyazi se guzar jate hain aap

dekhiye suniye zara ruk jaiye

chhoD kar hum ko kidhar jate hain aap

dard-e-dil ka kuchh to darman kijiye

dard hai dil mein magar jate hain aap

dil-nawazi aap ki fitrat nahin

kis liye dil toD kar jate hain aap

kis qadar viran hai duniya-e-dil

aah is se be-KHabar jate hain aap

hum bhi hain chashm-e-karam ke muntazir

kyon nigahen pher kar jate hain aap

chalte chalte kis par aa jata hai rahm

jate jate kyon Thahar jate hain aap

log jo kahte hain wo kahte rahen

kyon kisi ki baat par jate hain aap

ishq to hai raunaq-e-bazm-e-hayat

ishq se kyon itna Dar jate hain aap

ye muqaddar ka karam hai ai 'bahaar'

chah se pyase agar jate hain aap