samne us saf-e-mizhgan ke main kal jaunga

sāmne us saf-e-mizhgāñ ke maiñ kal jā.ūñgā

chhid to jā.ūñgā par aage se na Tal jā.ūñgā

teġh us abrū kī jab ma.arka-ārā hogī

apnī jāñ-bāzī ke gauhar maiñ ugal jā.ūñgā

hai kaf-e-pā vo musaffā ki jise dhyān meñ lā

pā-e-nazzāra ye kahtā hai phisal jā.ūñgā

mujh ko dete ho abas ḳhāna-e-zanjīr meñ jā

juuñ sadā maiñ abhī is ghar se nikal jā.ūñgā

aap se chāhūñ to uTh jā.ūñgā is bazm se maiñ

aur ik huuñ bhī karoge to machal jā.ūñgā

garche huuñ be-harakat zo.af se juuñ ātish-e-sañg

par jo chheḌā to sharar-sāñ maiñ uchhal jā.ūñgā

mom huuñ maiñ to butāñ mujh ko na samjho aahan

Tuk bhī tum garm hue to maiñ pighal jā.ūñgā

ġhussa ho kar tum agar laakh tarah badlo rang

maiñ vo yak-rang nahīñ huuñ jo badal jā.ūñgā

bekalī aaj bhī vaañ le ga.ī mujh ko to 'nazīr'

maiñ ne har-chand ye chāhā thā ki kal jā.ūñgā

samne us saf-e-mizhgan ke main kal jaunga

chhid to jaunga par aage se na Tal jaunga

tegh us abru ki jab marka-ara hogi

apni jaan-bazi ke gauhar main ugal jaunga

hai kaf-e-pa wo musaffa ki jise dhyan mein la

pa-e-nazzara ye kahta hai phisal jaunga

mujh ko dete ho abas KHana-e-zanjir mein ja

jun sada main abhi is ghar se nikal jaunga

aap se chahun to uTh jaunga is bazm se main

aur ek hun bhi karoge to machal jaunga

garche hun be-harakat zoaf se jun aatish-e-sang

par jo chheDa to sharar-san main uchhal jaunga

mom hun main to butan mujh ko na samjho aahan

Tuk bhi tum garm hue to main pighal jaunga

ghussa ho kar tum agar lakh tarah badlo rang

main wo yak-rang nahin hun jo badal jaunga

bekali aaj bhi wan le gai mujh ko to 'nazir'

main ne har-chand ye chaha tha ki kal jaunga