saneha qismaton ke darichon mein lapkega chhup jaega baat Tal jaegi

sāneha qismatoñ ke darīchoñ meñ lapkegā chhup jā.egā baat Tal jā.egī

sab musāfir gharoñ ko palaT jā.eñge ġham kī vahshat ḳhushī meñ badal jā.egī

ham sitāroñ kī mānind TūTeñge aur āsmāñ par lakīreñ banā jā.eñge

maut kā raqs kartī huī ek saa.at rukegī kahīñ phir sambhal jā.egī

saare bikhre hue lafz koī uThā lā.egā aan kī aan meñ aur phir

uljhī uljhī zabāñ apnī tartīb badlegī aur ik kahānī meñ Dhal jā.egī

ek din ham irāda kareñge ki ab apne ḳhvāboñ kī qīmat nahīñ leñge ham

ek din ham badal jā.eñge aur phir ḳhud-baḳhud saarī duniyā badal jā.egī

jab sitāre bujheñge to shab ke samundar meñ lahroñ kā ruḳh dekhne ke liye

sub.h-e-kāzib kī āñkheñ achānak khuleñgī bashārat kī qindīl jal jā.egī

dard kī lau kī maddham harārat ke pahlū meñ patthar kā dil bhī taḌaḳh jā.egā

ye jo lohe kī dīvār atrāf-e-jāñ khīñch rakhī hai ye bhī pighal jā.egī

ye bhī hogā ki dil aise ho jā.egā jaise is meñ koī aarzū hī na thī

itnā ḳhālī ye ho jā.egā ḳhālī hone kī dil se ḳhalish bhī nikal jā.egī

saneha qismaton ke darichon mein lapkega chhup jaega baat Tal jaegi

sab musafir gharon ko palaT jaenge gham ki wahshat KHushi mein badal jaegi

hum sitaron ki manind TuTenge aur aasman par lakiren bana jaenge

maut ka raqs karti hui ek saat rukegi kahin phir sambhal jaegi

sare bikhre hue lafz koi uTha laega aan ki aan mein aur phir

uljhi uljhi zaban apni tartib badlegi aur ek kahani mein Dhal jaegi

ek din hum irada karenge ki ab apne KHwabon ki qimat nahin lenge hum

ek din hum badal jaenge aur phir KHud-baKHud sari duniya badal jaegi

jab sitare bujhenge to shab ke samundar mein lahron ka ruKH dekhne ke liye

subh-e-kazib ki aankhen achanak khulengi bashaarat ki qindil jal jaegi

dard ki lau ki maddham hararat ke pahlu mein patthar ka dil bhi taDaKH jaega

ye jo lohe ki diwar atraf-e-jaan khinch rakhi hai ye bhi pighal jaegi

ye bhi hoga ki dil aise ho jaega jaise is mein koi aarzu hi na thi

itna KHali ye ho jaega KHali hone ki dil se KHalish bhi nikal jaegi