sans ka apni rag-e-jaan se guzar hone tak

saañs kā apnī rag-e-jāñ se guzar hone tak

dard hotā hai mujhe shab ke sahar hone tak

umr guzrī pa asar aah kā phir bhī na huā

jī ga.e ham bhī kisī zulf ke sar hone tak

jab vo samjheñge to ye dard meñ Dhal jā.egī

aah baaqī hai mirī sirf asar hone tak

thā taġhāful unheñ nau-mīdī-e-jāved bhī thī

ḳhāk-dar-ḳhāk the ham un ko ḳhabar hone tak

apne hī ḳhuuñ meñ nahātā hai har ik saañs ke saath

dil mirā dil thā kisī dard kā ghar hone tak

sāmnā partav-e-ḳhur kā kare shabnam kaise

zor lagtā hai bahut ḳhushk ko tar hone tak

ḳhaak haiñ ḳhaak meñ mil jaane kā Dar kyuuñ ho hameñ

ḳhauf khānā hai to qatre ko guhar hone tak

dil meñ ab rahm nahīñ mehr-o-mohabbat bhī nahīñ

vo bhī insāñ thā magar sāhab-e-zar hone tak

ho gayā ishq jo māyūs-e-tamannā ik baar

maut aa.egī use bār-e-digar hone tak

un ke bā-zābta hone kī hai 'tamjīd' umiid

ham bhī ho jaate haiñ ḳhāmosh magar hone tak

sans ka apni rag-e-jaan se guzar hone tak

dard hota hai mujhe shab ke sahar hone tak

umr guzri pa asar aah ka phir bhi na hua

ji gae hum bhi kisi zulf ke sar hone tak

jab wo samjhenge to ye dard mein Dhal jaegi

aah baqi hai meri sirf asar hone tak

tha taghaful unhen nau-midi-e-jawed bhi thi

KHak-dar-KHak the hum un ko KHabar hone tak

apne hi KHun mein nahata hai har ek sans ke sath

dil mera dil tha kisi dard ka ghar hone tak

samna partaw-e-KHur ka kare shabnam kaise

zor lagta hai bahut KHushk ko tar hone tak

KHak hain KHak mein mil jaane ka Dar kyun ho hamein

KHauf khana hai to qatre ko guhar hone tak

dil mein ab rahm nahin mehr-o-mohabbat bhi nahin

wo bhi insan tha magar sahab-e-zar hone tak

ho gaya ishq jo mayus-e-tamanna ek bar

maut aaegi use bar-e-digar hone tak

un ke ba-zabta hone ki hai 'tamjid' umid

hum bhi ho jate hain KHamosh magar hone tak