sanson ke pasban bahut thak chuki hun main

sāñsoñ ke pāsbān bahut thak chukī huuñ maiñ

ḳhud kah rahī hai jaan bahut thak chukī huuñ maiñ

ummīd ke ai dhundhle sitāre na jagmagā

ab mat ho mehrbān bahut thak chukī huuñ maiñ

sāñsoñ ke donoñ hāthoñ se ḳhud apne jism kā

thāme hue makān bahut thak chukī huuñ maiñ

pal pal junūn-e-ishq kī manzil kā aap ko

de de ke itmīnān bahut thak chukī huuñ maiñ

mujh ko bulandiyoñ se pukārā gayā to phir

kah dūñgī āsmān bahut thak chukī huuñ maiñ

dafnā do mujh ko mere hī maazī kī qabr maiñ

jī jī ke vartamān bahut thak chukī huuñ maiñ

bujhte hue charāġh sī kahtī hai ab 'shikhā'

ai rabb-e-do-jahān bahut thak chukī huuñ maiñ

sanson ke pasban bahut thak chuki hun main

KHud kah rahi hai jaan bahut thak chuki hun main

ummid ke ai dhundhle sitare na jagmaga

ab mat ho mehrban bahut thak chuki hun main

sanson ke donon hathon se KHud apne jism ka

thame hue makan bahut thak chuki hun main

pal pal junun-e-ishq ki manzil ka aap ko

de de ke itminan bahut thak chuki hun main

mujh ko bulandiyon se pukara gaya to phir

kah dungi aasman bahut thak chuki hun main

dafna do mujh ko mere hi mazi ki qabr main

ji ji ke wartaman bahut thak chuki hun main

bujhte hue charagh si kahti hai ab 'shikha'

ai rabb-e-do-jahan bahut thak chuki hun main