saqi hi jab na hoga to mai-KHana phir kahan

saaqī hī jab na hogā to mai-ḳhāna phir kahāñ

āsūda hogā jazba-e-rindāna phir kahāñ

sahrā-e-ġham ko aap na mahdūd kījiye

jā kar rahegā aap kā dīvāna phir kahāñ

dīvāngān-e-ishq ko rahne bhī dījiye

suniyegā aap dard kā afsāna phir kahāñ

terā ishāra silsila-jumbāñ na ho agar

ye dasht phir kahāñ tirā dīvāna phir kahāñ

rindān-e-mai-parast jo uTh jaa.eñ bazm se

ye anjuman ye gardish-e-paimāna phir kahāñ

apnī jafā-o-jaur pe qaa.em raheñ huzūr

varna milegā ye dil-e-dīvāna phir kahāñ

sun le hikāyat-e-ġham-e-barbādī-e-hayāt

mahfil meñ terī ishq kā afsāna phir kahāñ

mujh ko sikhā.e husn ne ādāb-e-bandagī

varna ḳhayāl-e-ka.aba-o-but-ḳhāna phir kahāñ

tere huzūr kar luuñ agar ijz maiñ qubūl

merī taraf nigāh-e-harīfāna phir kahāñ

uTh jaa.e tere ruḳh se agar parda-e-majāz

hangāma-hā-e-ka.aba-o-but-ḳhāna phir kahāñ

'sāqib' mirī hī zaat se sahrā kā naam hai

baaqī rahegī azmat-e-vīrāna phir kahāñ

saqi hi jab na hoga to mai-KHana phir kahan

aasuda hoga jazba-e-rindana phir kahan

sahra-e-gham ko aap na mahdud kijiye

ja kar rahega aap ka diwana phir kahan

diwangan-e-ishq ko rahne bhi dijiye

suniyega aap dard ka afsana phir kahan

tera ishaara silsila-jumban na ho agar

ye dasht phir kahan tera diwana phir kahan

rindan-e-mai-parast jo uTh jaen bazm se

ye anjuman ye gardish-e-paimana phir kahan

apni jafa-o-jaur pe qaem rahen huzur

warna milega ye dil-e-diwana phir kahan

sun le hikayat-e-gham-e-barbaadi-e-hayat

mahfil mein teri ishq ka afsana phir kahan

mujh ko sikhae husn ne aadab-e-bandagi

warna KHayal-e-kaba-o-but-KHana phir kahan

tere huzur kar lun agar ijz main qubul

meri taraf nigah-e-harifana phir kahan

uTh jae tere ruKH se agar parda-e-majaz

hangama-ha-e-kaba-o-but-KHana phir kahan

'saqib' meri hi zat se sahra ka nam hai

baqi rahegi azmat-e-virana phir kahan