saqi ke nam-lewa maiKHane rah gae hain

saaqī ke nām-levā maiḳhāne rah ga.e haiñ

mai-ḳhānoñ meñ bhī ḳhālī paimāne rah ga.e haiñ

be-maqsad-e-junūñ haiñ majnūñ jo dasht meñ haiñ

lailā nahīñ rahī hai dīvāne rah ga.e haiñ

ban kar jo ik haqīqat duniyā pe chhā ga.e the

duniyā meñ aaj un ke afsāne rah ga.e haiñ

mahfil rahe tumhārī mahfil meñ tum raho ab

vo kyā raheñ jo ho kar begāne rah ga.e haiñ

pahchānñā ab un ko dushvār ho gayā hai

jo log apne jāne-pahchāne rah ga.e haiñ

qabroñ meñ sone vaalo tum ko pukārte haiñ

ishrat-kade jo ban kar ġham-ḳhāne rah ga.e haiñ

dekh ai nigāh-e-ibrat āsār-e-ahd-e-māzī

ābādiyoñ ke ho kar vīrāne rah ga.e haiñ

ai gosh-e-ibrat un ko tū sun sake to sun le

ye kuchh haqīqatoñ ke afsāne rah ga.e haiñ

ai sham-e-sub.h-e-mahfil un ko jalā ke bujhnā

do-chār aur tere parvāne rah ga.e haiñ

dīvānoñ ko jo 'bismil' badnām kar rahe haiñ

dīvānoñ meñ abhī kuchh farzāne rah ga.e haiñ

saqi ke nam-lewa maiKHane rah gae hain

mai-KHanon mein bhi KHali paimane rah gae hain

be-maqsad-e-junun hain majnun jo dasht mein hain

laila nahin rahi hai diwane rah gae hain

ban kar jo ek haqiqat duniya pe chha gae the

duniya mein aaj un ke afsane rah gae hain

mahfil rahe tumhaari mahfil mein tum raho ab

wo kya rahen jo ho kar begane rah gae hain

pahchanna ab un ko dushwar ho gaya hai

jo log apne jaane-pahchane rah gae hain

qabron mein sone walo tum ko pukarte hain

ishrat-kade jo ban kar gham-KHane rah gae hain

dekh ai nigah-e-ibrat aasar-e-ahd-e-mazi

aabaadiyon ke ho kar virane rah gae hain

ai gosh-e-ibrat un ko tu sun sake to sun le

ye kuchh haqiqaton ke afsane rah gae hain

ai sham-e-subh-e-mahfil un ko jala ke bujhna

do-chaar aur tere parwane rah gae hain

diwanon ko jo 'bismil' badnam kar rahe hain

diwanon mein abhi kuchh farzane rah gae hain