saqi ki nigahon ka paigham nahin aata

saaqī kī nigāhoñ kā paiġhām nahīñ aatā

jis jaam kā tālib huuñ vo jaam nahīñ aatā

mai-ḳhvāroñ kī laġhzish par duniyā kī nigāheñ haiñ

nā-fahmī-e-vā.iz par ilzām nahīñ aatā

allāh-re majbūrī allāh-re mahrūmī

yā bārish-e-sahbā thī yā jaam nahīñ aatā

betābī-e-dil rāz-e-taskīn-e-mohabbat hai

achchhe haiñ vahī jin ko ārām nahīñ aatā

yā dil ke dhaḌakte hī uThtī thī nazar un kī

yā dil kā taḌapnā bhī ab kaam nahīñ aatā

mai-kash kī bhī suntā hai zāhid kī bhī suntā hai

us dar se kabhī koī nākām nahīñ aatā

merī hī nazar 'shā.ir' rusvā hai zamāne meñ

husn-e-sar-e-mahfil par ilzām nahīñ aatā

saqi ki nigahon ka paigham nahin aata

jis jam ka talib hun wo jam nahin aata

mai-KHwaron ki laghzish par duniya ki nigahen hain

na-fahmi-e-waiz par ilzam nahin aata

allah-re majburi allah-re mahrumi

ya barish-e-sahba thi ya jam nahin aata

betabi-e-dil raaz-e-taskin-e-mohabbat hai

achchhe hain wahi jin ko aaram nahin aata

ya dil ke dhaDakte hi uThti thi nazar un ki

ya dil ka taDapna bhi ab kaam nahin aata

mai-kash ki bhi sunta hai zahid ki bhi sunta hai

us dar se kabhi koi nakaam nahin aata

meri hi nazar 'shair' ruswa hai zamane mein

husn-e-sar-e-mahfil par ilzam nahin aata