saqi phir aaya saghar-e-sahba liye hue

saaqī phir aaya sāġhar-e-sahbā liye hue

yā merī zindagī kā sahārā liye hue

āñkhoñ meñ haiñ vo chashma-e-sahbā liye hue

yā āb-e-zindagī ke haiñ dariyā liye hue

baiThā huuñ intizār meñ ik hīla-jū ke phir

rag-rag meñ iztirāb kī duniyā liye hue

tajdīd-e-va.ada phir huī tamhīd-e-iztirāb

phir ḳhirman-e-umīd hai sho.ala liye hue

nazr-e-nigāh-e-nargis-e-mastāna ho gayā

aaya thā shaiḳh ḳhirqa-e-taqvā liye hue

merā sukūt matlab-e-be-lafz ho to ho

maiñ aa.uuñ aur arz-e-tamannā liye hue

is tarah us kī bazm se dil le chalā huuñ maiñ

jis tarah koī jaa.e janāza liye hue

phir kar rahā huuñ ġhaur vajūhāt-e-ishq par

us paikar-e-jamāl kā naqsha liye hue

zālim kā har sitam hai tavajjoh kī ik dalīl

us kī jafā vafā kā hai naqsha liye hue

phir jā rahā hai 'bedil'-e-afsurda dekhiye

ġhārat-gar-e-sukūñ kī tamanna liye hue

saqi phir aaya saghar-e-sahba liye hue

ya meri zindagi ka sahaara liye hue

aankhon mein hain wo chashma-e-sahba liye hue

ya aab-e-zindagi ke hain dariya liye hue

baiTha hun intizar mein ek hila-ju ke phir

rag-rag mein iztirab ki duniya liye hue

tajdid-e-wada phir hui tamhid-e-iztirab

phir KHirman-e-umid hai shoala liye hue

nazr-e-nigah-e-nargis-e-mastana ho gaya

aaya tha shaiKH KHirqa-e-taqwa liye hue

mera sukut matlab-e-be-lafz ho to ho

main aaun aur arz-e-tamanna liye hue

is tarah us ki bazm se dil le chala hun main

jis tarah koi jae janaza liye hue

phir kar raha hun ghaur wajuhat-e-ishq par

us paikar-e-jamal ka naqsha liye hue

zalim ka har sitam hai tawajjoh ki ek dalil

us ki jafa wafa ka hai naqsha liye hue

phir ja raha hai 'bedil'-e-afsurda dekhiye

ghaarat-gar-e-sukun ki tamanna liye hue