saqi tera jamal bhi meri nazar mein hai

saaqī tirā jamāl bhī merī nazar meñ hai

maiñ jāntā huuñ nuur jo shams-o-qamar meñ hai

merā lahū bahā ke adū mutma.in nahīñ

ab merā ḳhāndān bhī us kī nazar meñ hai

aḳhbār dekhtā hai vo hasrat kī aañkh se

qaarī kī zindagī kisī achchhī ḳhabar meñ hai

yūñhī nahīñ hai shaam se āñkhoñ meñ iztirāb

ḳhushbū batā rahī hai koī rahguzar meñ hai

māñjhī badal badal ke mirī fikr thak ga.ī

lekin mirā safīna abhī tak bhañvar meñ hai

chhuTkārā pā ga.e haiñ sabhī is ḳhayāl se

insāniyat kā dard faqat mere sar meñ hai

dariyā ke do kināre haiñ milte nahīñ kabhī

'muztar' azal se bair yahāñ ḳhair-o-shar meñ hai

saqi tera jamal bhi meri nazar mein hai

main jaanta hun nur jo shams-o-qamar mein hai

mera lahu baha ke adu mutmain nahin

ab mera KHandan bhi us ki nazar mein hai

aKHbar dekhta hai wo hasrat ki aankh se

qari ki zindagi kisi achchhi KHabar mein hai

yunhi nahin hai sham se aankhon mein iztirab

KHushbu bata rahi hai koi rahguzar mein hai

manjhi badal badal ke meri fikr thak gai

lekin mera safina abhi tak bhanwar mein hai

chhuTkara pa gae hain sabhi is KHayal se

insaniyat ka dard faqat mere sar mein hai

dariya ke do kinare hain milte nahin kabhi

'muztar' azal se bair yahan KHair-o-shar mein hai