saqi tere saghar ke talabgar bahut hain

saaqī tire sāġhar ke talabgār bahut haiñ

mai kam hai magar bazm meñ mai-ḳhvār bahut haiñ

chaukhaT se tirī uTh ke na jā.eñge kahīñ aur

dīvāne haiñ phir bhī ye samajhdār bahut haiñ

hai un kī bhī āñkhoñ meñ tire diid kī ḳhvāhish

jo haiñ pas-e-dīvār vo ḳhud.dār bahut haiñ

bas jins-e-vafā kī koī qīmat nahīñ miltī

miTTī bhī jo becho to ḳharīdār bahut haiñ

kahtī haiñ ye tālāb meñ bahtī huī lāsheñ

is gaañv meñ qātil ke taraf-dār bahut haiñ

is dil ke dhaḌakne kī sadā kaun sunegā

is mulk meñ īñToñ ke parastār bahut haiñ

koī bhī sar-e-dār nazar aaya na ham ko

kahne ke liye mīsam-e-tammār bahut haiñ

vāris koī miltā nahīñ ab lauh-o-qalam kā

kahne ko to 'rizvān' qalamkār bahut haiñ

saqi tere saghar ke talabgar bahut hain

mai kam hai magar bazm mein mai-KHwar bahut hain

chaukhaT se teri uTh ke na jaenge kahin aur

diwane hain phir bhi ye samajhdar bahut hain

hai un ki bhi aankhon mein tere did ki KHwahish

jo hain pas-e-diwar wo KHuddar bahut hain

bas jins-e-wafa ki koi qimat nahin milti

miTTi bhi jo becho to KHaridar bahut hain

kahti hain ye talab mein bahti hui lashen

is ganw mein qatil ke taraf-dar bahut hain

is dil ke dhaDakne ki sada kaun sunega

is mulk mein inTon ke parastar bahut hain

koi bhi sar-e-dar nazar aaya na hum ko

kahne ke liye misam-e-tammar bahut hain

waris koi milta nahin ab lauh-o-qalam ka

kahne ko to 'rizwan' qalamkar bahut hain