saqi to mohabbat se do ghunT pilaega

saaqī to mohabbat se do ghūñT pilā.egā

lekin bharī mahfil meñ ehsān jatā.egā

jis haath ke patthar ne auroñ ko kiyā zaḳhmī

patthar ke kabhī nīche vo haath bhī aa.egā

jab munsif-o-qātil meñ kuchh farq nahīñ baaqī

phir kaun adālat kī zanjīr hilā.egā

zālim ko jo mil jaa.e gar chhūT gulistāñ meñ

vo nanhe parindoñ ko rah rah ke satā.egā

jab dard meñ Duubī ho tasvīr zamāne kī

phir naġhma-e-ulfat tū kis raag meñ gā.egā

alfāz ke parde meñ har baat chhupā 'irfāñ'

kyā kyā hai tire dil meñ ye lahja batā.egā

saqi to mohabbat se do ghunT pilaega

lekin bhari mahfil mein ehsan jataega

jis hath ke patthar ne auron ko kiya zaKHmi

patthar ke kabhi niche wo hath bhi aaega

jab munsif-o-qatil mein kuchh farq nahin baqi

phir kaun adalat ki zanjir hilaega

zalim ko jo mil jae gar chhuT gulistan mein

wo nanhe parindon ko rah rah ke sataega

jab dard mein Dubi ho taswir zamane ki

phir naghma-e-ulfat tu kis rag mein gaega

alfaz ke parde mein har baat chhupa 'irfan'

kya kya hai tere dil mein ye lahja bataega