sara aalam dhup ka sa saya-e-ashjar mein

saarā aalam dhuup kā sā sāya-e-ashjār meñ

dam kahāñ se aa.egā marte hue bīmār meñ

is tanāsub par karoge ġhaur to mar jāoge

ḳhuun ke chhīñTe haiñ kitne surḳhī-e-dīvār meñ

āḌī-tirchhī sūrateñ hī ug rahī haiñ shāḳh par

kis ne TuuTe ā.inoñ ko rakh diyā gulzār meñ

sar jhukāne ko jhukā deñ ham to yuuñ bhī sau dafa

shāḳh-e-gul kī bū kahāñ se aap kī talvār meñ

kaun sī baazī lagā.ī jā rahī hai dekhnā

log marte jā rahe haiñ kūcha-e-dildār meñ

jaane kin chehroñ kī sāzish kā natīja hai 'shamīm'

aa.ine TuuTe paḌe haiñ vaqt ke bāzār meñ

sara aalam dhup ka sa saya-e-ashjar mein

dam kahan se aaega marte hue bimar mein

is tanasub par karoge ghaur to mar jaoge

KHun ke chhinTe hain kitne surKHi-e-diwar mein

aaDi-tirchhi suraten hi ug rahi hain shaKH par

kis ne TuTe aainon ko rakh diya gulzar mein

sar jhukane ko jhuka den hum to yun bhi sau dafa

shaKH-e-gul ki bu kahan se aap ki talwar mein

kaun si bazi lagai ja rahi hai dekhna

log marte ja rahe hain kucha-e-dildar mein

jaane kin chehron ki sazish ka natija hai 'shamim'

aaine TuTe paDe hain waqt ke bazar mein