sara maiKHane ka mai-KHana nahin thoDi si

saarā maiḳhāne kā mai-ḳhāna nahīñ thoḌī sī

aap kah deñ to pī leñge yahīñ thoḌī sī

mere afsāne par us jān-e-taġhāful ne kahā

ye kahānī hai dar-āġhosh-e-yaqīñ thoḌī sī

phir ḳhudā jaane kise ham meñ se fursat na mile

guftugū aap se ho jaa.e yahīñ thoḌī sī

sāqī-e-bazm-e-azal terī saḳhāvat ke nisār

ham balā-nosh bhī piite haiñ kahīñ thoḌī sī

jiite jī go kisī jāgīr ke mālik na hue

mar ke mil jā.egī ham ko bhī zamīñ thoḌī sī

sajda-rezī se badalte haiñ muqaddar naḳhshab

aap ghiste to kisī dar pe jabīñ thoḌī sī

sara maiKHane ka mai-KHana nahin thoDi si

aap kah den to pi lenge yahin thoDi si

mere afsane par us jaan-e-taghaful ne kaha

ye kahani hai dar-aghosh-e-yaqin thoDi si

phir KHuda jaane kise hum mein se fursat na mile

guftugu aap se ho jae yahin thoDi si

saqi-e-bazm-e-azal teri saKHawat ke nisar

hum bala-nosh bhi pite hain kahin thoDi si

jite ji go kisi jagir ke malik na hue

mar ke mil jaegi hum ko bhi zamin thoDi si

sajda-rezi se badalte hain muqaddar naKHshab

aap ghiste to kisi dar pe jabin thoDi si