sare manzar KHak hote ja rahe hain dosto

saare manzar ḳhaak hote jā rahe haiñ dosto

ham ne jo paayā hai khote jā rahe haiñ dosto

aao paidal hī safar ke silsiloñ ko rauñd deñ

baiThe baiThe bāñjh hote jā rahe haiñ dosto

saañs kī Dorī meñ ujḌe mausamoñ kī sīpiyāñ

ik tasalsul se pirote jā rahe haiñ dosto

tairtī muḌ muḌ ke taktī kashtiyoñ ke bādbāñ

rafta rafta duur hote jā rahe haiñ dosto

nā-samajh is sar-zamīn par aane vāloñ ke liye

nit na.e bohrān bote jā rahe haiñ dosto

ye ghanī chhāñv paḌāv thī na.e āġhāz kā

is ghanī chhāñv meñ sote jā rahe haiñ dosto

sare manzar KHak hote ja rahe hain dosto

hum ne jo paya hai khote ja rahe hain dosto

aao paidal hi safar ke silsilon ko raund den

baiThe baiThe banjh hote ja rahe hain dosto

sans ki Dori mein ujDe mausamon ki sipiyan

ek tasalsul se pirote ja rahe hain dosto

tairti muD muD ke takti kashtiyon ke baadban

rafta rafta dur hote ja rahe hain dosto

na-samajh is sar-zamin par aane walon ke liye

nit nae bohran bote ja rahe hain dosto

ye ghani chhanw paDaw thi nae aaghaz ka

is ghani chhanw mein sote ja rahe hain dosto