sare ummidon ke phulon ko kuchal kar rakh diya

saare ummīdoñ ke phūloñ ko kuchal kar rakh diyā

shīsha-e-dil par hamāre us ne patthar rakh diyā

apnī bastī se añdherā duur ho ye soch kar

aag kī bāñhoñ meñ ham ne apnā chhappar rakh diyā

us kī āñkhoñ meñ jo dekhe the ba-vaqt-e-ruḳhsatī

naam un ashkoñ kā ham ne la.al-o-gauhar rakh diyā

kyā na.ī tahzīb mere ghar talak bhī aa ga.ī

sar kā dopaTTa jo beTī ne uThā kar rakh diyā

saarī hī tahrīr maliyā-meT ho kar rah ga.ī

us ne kāġhaz par jo apnā dīda-e-tar rakh diyā

maslahat ke phūloñ meñ ḳhanjar na ho koī chhupā

sochiye qadmoñ pe us ne kyoñ mire sar rakh diyā

ḳhud vo apne aap meñ majbūr thā 'zāhid' bahut

bevafā.ī kā magar ilzām mujh par rakh diyā

sare ummidon ke phulon ko kuchal kar rakh diya

shisha-e-dil par hamare us ne patthar rakh diya

apni basti se andhera dur ho ye soch kar

aag ki banhon mein hum ne apna chhappar rakh diya

us ki aankhon mein jo dekhe the ba-waqt-e-ruKHsati

nam un ashkon ka hum ne lal-o-gauhar rakh diya

kya nai tahzib mere ghar talak bhi aa gai

sar ka dopaTTa jo beTi ne uTha kar rakh diya

sari hi tahrir maliya-meT ho kar rah gai

us ne kaghaz par jo apna dida-e-tar rakh diya

maslahat ke phulon mein KHanjar na ho koi chhupa

sochiye qadmon pe us ne kyon mere sar rakh diya

KHud wo apne aap mein majbur tha 'zahid' bahut

bewafai ka magar ilzam mujh par rakh diya