sare wadon se mukar jaana tha

saare va.adoñ se mukar jaanā thā

dil ne ik roz to bhar jaanā thā

bahr se uTh ke havā ke hamrāh

ham ko sahrā meñ bikhar jaanā thā

rāh-e-pur-ḳhār thī aur ābla-pā

jā na sakte the magar jaanā thā

ye kahāñ aa ga.e bahte bahte

jis taraf tū hai udhar jaanā thā

vādī-e-nūr meñ ruknā thā hameñ

ḳhema-e-gul meñ Thahar jaanā thā

ab yahāñ aa ke bhī karnā kyā hai

terī chaukhaT hī pe mar jaanā thā

TikTikī bāñdh rakhī hai tujh par

merī āñkhoñ ko to bhar jaanā thā

raqs karnā thā bhañvar ke hamrāh

aur pātāl utar jaanā thā

chāñd bhī jāgtā rahtā kab tak

ham ko bhī lauT ke ghar jaanā thā

sare wadon se mukar jaana tha

dil ne ek roz to bhar jaana tha

bahr se uTh ke hawa ke hamrah

hum ko sahra mein bikhar jaana tha

rah-e-pur-KHar thi aur aabla-pa

ja na sakte the magar jaana tha

ye kahan aa gae bahte bahte

jis taraf tu hai udhar jaana tha

wadi-e-nur mein rukna tha hamein

KHema-e-gul mein Thahar jaana tha

ab yahan aa ke bhi karna kya hai

teri chaukhaT hi pe mar jaana tha

TikTiki bandh rakhi hai tujh par

meri aankhon ko to bhar jaana tha

raqs karna tha bhanwar ke hamrah

aur patal utar jaana tha

chand bhi jagta rahta kab tak

hum ko bhi lauT ke ghar jaana tha