sari KHush-fahmi shuur-o-falsafa pani hua

saarī ḳhush-fahmī shu'ūr-o-falsafa paanī huā

vo udhar bole idhar merā kahā paanī huā

bhīgte lahje meñ kyā karte koī iz.hār-e-hāl

lab se jo niklā vahī harf-e-du'ā paanī huā

tujh se mill kar gum hue ḳhud apne ḳhadd-o-ḳhāl bhī

maiñ ki jaise barf thā tū ne chhuā paanī huā

she'r meñ mumkin nahīñ tā'rīf us ke husn kī

dekh kar jis kā sarāpā ā.īna paanī huā

saare lā-yanhal masā.il haath malte rah ga.e

maiñ sajā kar apnā pindār-e-anā paanī huā

yuuñ hī āñkhoñ meñ nahīñ aa jaate aañsū dosto

dard kā ehsās jab had se baḌhā paanī huā

al-amāñ ai ḳhud-farebī al-madad ḳhush-fahmiyo

ab kise āvāz duuñ sar se sivā paanī huā

ham ne bil-āḳhir vafā kī laaj rakh lī dosto

lekin is jehd-e-'amal meñ ḳhuun kā paanī huā

'umr bhar kī justujū tinkoñ kī sūrat bah ga.ī

kho ga.iiñ samteñ 'zafar' jab rāsta paanī huā

sari KHush-fahmi shu'ur-o-falsafa pani hua

wo udhar bole idhar mera kaha pani hua

bhigte lahje mein kya karte koi izhaar-e-haal

lab se jo nikla wahi harf-e-du'a pani hua

tujh se mill kar gum hue KHud apne KHadd-o-KHal bhi

main ki jaise barf tha tu ne chhua pani hua

she'r mein mumkin nahin ta'rif us ke husn ki

dekh kar jis ka sarapa aaina pani hua

sare la-yanhal masail hath malte rah gae

main saja kar apna pindar-e-ana pani hua

yun hi aankhon mein nahin aa jate aansu dosto

dard ka ehsas jab had se baDha pani hua

al-aman ai KHud-farebi al-madad KHush-fahmiyo

ab kise aawaz dun sar se siwa pani hua

hum ne bil-aKHir wafa ki laj rakh li dosto

lekin is jehd-e-'amal mein KHun ka pani hua

'umr bhar ki justuju tinkon ki surat bah gai

kho gain samten 'zafar' jab rasta pani hua