sari tabiren hain uski sare KHwab uske liye

saarī ta.abīreñ haiñ us kī saare ḳhvāb us ke liye

har savāl us ke liye hai har javāb us ke liye

hijr ke lamhe shumāreñ yā lakīreñ harf ham

har hisāb us ke liye hai har kitāb us ke liye

qurb us kā hai hamārī vāpsī kā muntazir

jhelte haiñ ham bhī duurī kā azaab us ke liye

vo hamāre vāste rahtā hai har dam muztarib

ham bhī haiñ aa.e hue zer-e-itāb us ke liye

us ke har dukh kā mudāvā apne bas meñ bhī nahīñ

ashk-e-ḳhūñ us ke liye haiñ dil kabāb us ke liye

man kī har ḳhvāhish ko vaarā us kī chāhat par 'shafīq'

khil rahe haiñ tan pe zaḳhmoñ ke gulāb us ke liye

sari tabiren hain us ki sare KHwab us ke liye

har sawal us ke liye hai har jawab us ke liye

hijr ke lamhe shumaren ya lakiren harf hum

har hisab us ke liye hai har kitab us ke liye

qurb us ka hai hamari wapsi ka muntazir

jhelte hain hum bhi duri ka azab us ke liye

wo hamare waste rahta hai har dam muztarib

hum bhi hain aae hue zer-e-itab us ke liye

us ke har dukh ka mudawa apne bas mein bhi nahin

ashk-e-KHun us ke liye hain dil kabab us ke liye

man ki har KHwahish ko wara us ki chahat par 'shafiq'

khil rahe hain tan pe zaKHmon ke gulab us ke liye