sari tartib-e-zamani meri dekhi hui hai

saarī tartīb-e-zamānī mirī dekhī huī hai

is kī tashkīl purānī mirī dekhī huī hai

zarre zarre ko batātā phirūñ kyā bahr thā maiñ

reg-e-sahrā ne ravānī mirī dekhī huī hai

ye jo hastī hai kabhī ḳhvāb huā kartī thī

ḳhvāb kī naql-e-makānī mirī dekhī huī hai

yūñhī to kunj-e-qanā.at meñ nahīñ aayā huuñ

khusravī shāh-jahānī mirī dekhī huī hai

dil ke bāzār meñ kyā suud o ziyāñ hotā thā

us kī arzānī girānī mirī dekhī huī hai

ik zamāne meñ to maiñ lafz huā kartā thā

tañgi-e-jū-e-ma.ānī mirī dekhī huī hai

tum jo sunte ho charāġhoñ kī zabānī to suno

shab kī har ek kahānī mirī dekhī huī hai

maiñ tire vasl ke gardāb meñ aane kā nahīñ

is kī har mauj purānī mirī dekhī huī hai

sari tartib-e-zamani meri dekhi hui hai

is ki tashkil purani meri dekhi hui hai

zarre zarre ko batata phirun kya bahr tha main

reg-e-sahra ne rawani meri dekhi hui hai

ye jo hasti hai kabhi KHwab hua karti thi

KHwab ki naql-e-makani meri dekhi hui hai

yunhi to kunj-e-qanaat mein nahin aaya hun

khusrawi shah-jahani meri dekhi hui hai

dil ke bazar mein kya sud o ziyan hota tha

us ki arzani girani meri dekhi hui hai

ek zamane mein to main lafz hua karta tha

tangi-e-ju-e-maani meri dekhi hui hai

tum jo sunte ho charaghon ki zabani to suno

shab ki har ek kahani meri dekhi hui hai

main tere wasl ke gardab mein aane ka nahin

is ki har mauj purani meri dekhi hui hai