sath ho koi to kuchh taskin si pata hun main

saath ho koī to kuchh taskīn sī paatā huuñ maiñ

tere aage jā ke tanhā aur ghabrātā huuñ maiñ

sāmne aate hī un ke chup sā ho jaatā huuñ maiñ

jaise ḳhud apnī tamannāoñ se sharmātā huuñ maiñ

ik musalsal zabt hī kā naam shāyad ishq hai

ab to nazroñ tak ko āñkhoñ hī meñ pī jaatā huuñ maiñ

dekh sakte kaash tum merī tamannāoñ kā jashn

jab unheñ jhūTī ummīdeñ de ke bahlātā huuñ

mere pairoñ ko hai kuchh roñdī huī rāhoñ se bair

jis taraf koī nahīñ jaatā udhar jaatā huuñ maiñ

ik nigāh-e-lutf aate hī vahī hai hāl-e-dil

sab purāne tajraboñ ko bhuul sā jaatā huuñ maiñ

ye mire ashk-e-musalsal bas musalsal ashk haiñ

kaun kahtā hai tumhārā naam dohrātā huuñ maiñ

shām-e-ġham kyā kyā tasavvur kī haiñ chīra-dastiyāñ

haañ tumheñ bhī tum se bin pūchhe uThā laatā huuñ maiñ

kārobār-e-ishq meñ duniyā kī jhūTī maslahat

mujh ko samjhāte haiñ vo aur dil ko samjhātā huuñ maiñ

saath tere zindagī kā vo tasavvur meñ safar

jaise phūloñ par qadam rakhtā chalā jaatā huuñ maiñ

rañj-e-insāñ kī haqīqat meñ to samjhā huuñ yahī

aaj duniyā meñ mohabbat kī kamī paatā huuñ maiñ

mere aañsū meñ ḳhushbū mere har naale meñ raag

ab to har ik saañs meñ shāmil tumheñ paatā huuñ maiñ

ab tamannā be-sadā hai ab nigāheñ be-payām

zindagī ik farz hai jiitā chalā jaatā huuñ maiñ

haa.e 'mullā' kab milī ḳhāmoshī-e-ulfat kī daad

koī ab kahtā hai kuchh un se to yaad aatā huuñ maiñ

sath ho koi to kuchh taskin si pata hun main

tere aage ja ke tanha aur ghabraata hun main

samne aate hi un ke chup sa ho jata hun main

jaise KHud apni tamannaon se sharmata hun main

ek musalsal zabt hi ka nam shayad ishq hai

ab to nazron tak ko aankhon hi mein pi jata hun main

dekh sakte kash tum meri tamannaon ka jashn

jab unhen jhuTi ummiden de ke bahlata hun

mere pairon ko hai kuchh rondi hui rahon se bair

jis taraf koi nahin jata udhar jata hun main

ek nigah-e-lutf aate hi wahi hai haal-e-dil

sab purane tajrabon ko bhul sa jata hun main

ye mere ashk-e-musalsal bas musalsal ashk hain

kaun kahta hai tumhaara nam dohraata hun main

sham-e-gham kya kya tasawwur ki hain chira-dastiyan

han tumhein bhi tum se bin puchhe uTha lata hun main

karobar-e-ishq mein duniya ki jhuTi maslahat

mujh ko samjhate hain wo aur dil ko samjhata hun main

sath tere zindagi ka wo tasawwur mein safar

jaise phulon par qadam rakhta chala jata hun main

ranj-e-insan ki haqiqat mein to samjha hun yahi

aaj duniya mein mohabbat ki kami pata hun main

mere aansu mein KHushbu mere har nale mein rag

ab to har ek sans mein shamil tumhein pata hun main

ab tamanna be-sada hai ab nigahen be-payam

zindagi ek farz hai jita chala jata hun main

hae 'mulla' kab mili KHamoshi-e-ulfat ki dad

koi ab kahta hai kuchh un se to yaad aata hun main