sath walon ko yahan par yun akela chhoD kar

saath vāloñ ko yahāñ par yuuñ akelā chhoḌ kar

aap tanhā ho na jaa.eñ saath sab kā chhoḌ kar

duur se har ek chehra lagtā hai apnā magar

aap bhī chal hī diye nā saath merā chhoḌ kar

yaad ham hī ā.eñge us vaqt tum ko bārhā

jab chalā jā.egā koī tum ko apnā chhoḌ kar

us ke maiñ nazdīk itne aa gayā huuñ aaj kal

sab nazar aatā hai mujh ko us kā chehra chhoḌ kar

ghar meñ aaya to udāsī ruuTh kar kahne lagī

is tarah jaate nahīñ haiñ ghar kā dar vā chhoḌ kar

in laboñ se ek din tum hī kahoge dekhnā

koī ham ko mil na paayā aap jaisā chhoḌ kar

ek muddat saath apne rahte rahte thak ga.ī

ab udāsī jā rahī hai ghar hamārā chhoḌ kar

baat merī māniye yā pochhiye sayyād se

koī panchhī ḳhush nahīñ hai aaj piñjra chhoḌ kar

sath walon ko yahan par yun akela chhoD kar

aap tanha ho na jaen sath sab ka chhoD kar

dur se har ek chehra lagta hai apna magar

aap bhi chal hi diye na sath mera chhoD kar

yaad hum hi aaenge us waqt tum ko barha

jab chala jaega koi tum ko apna chhoD kar

us ke main nazdik itne aa gaya hun aaj kal

sab nazar aata hai mujh ko us ka chehra chhoD kar

ghar mein aaya to udasi ruTh kar kahne lagi

is tarah jate nahin hain ghar ka dar wa chhoD kar

in labon se ek din tum hi kahoge dekhna

koi hum ko mil na paya aap jaisa chhoD kar

ek muddat sath apne rahte rahte thak gai

ab udasi ja rahi hai ghar hamara chhoD kar

baat meri maniye ya pochhiye sayyaad se

koi panchhi KHush nahin hai aaj pinjra chhoD kar