saya-e-zulf siyah-fam kahan tak pahunche

sāya-e-zulf siyah-fām kahāñ tak pahuñche

jaane ye silsila-e-shām kahāñ tak pahuñche

duur ufuq paar sahī pā to liyā hai tujh ko

dekh ham le ke tirā naam kahāñ tak pahuñche

ye sisaktī huī rāteñ ye bilakte manzar

ham bhī ai sāya-e-gulfām kahāñ tak pahuñche

na kahīñ sāya-e-gul hai na kahīñ zikr-e-habīb

aur ab gardish-e-ayyām kahāñ tak pahuñche

ham to rusvā the magar un kī nazar bhī na bachī

ham pe aa.e hue ilzām kahāñ tak pahuñche

mutma.in garmī-e-ehsās-e-jafā se bhī nahīñ

dil ko pahuñche bhī to ārām kahāñ tak pahuñche

un kī āñkhoñ ko diye the jo mirī āñkhoñ ne

kis se pūchhūñ ki vo paiġhām kahāñ tak pahuñche

saya-e-zulf siyah-fam kahan tak pahunche

jaane ye silsila-e-sham kahan tak pahunche

dur ufuq par sahi pa to liya hai tujh ko

dekh hum le ke tera nam kahan tak pahunche

ye sisakti hui raaten ye bilakte manzar

hum bhi ai saya-e-gulfam kahan tak pahunche

na kahin saya-e-gul hai na kahin zikr-e-habib

aur ab gardish-e-ayyam kahan tak pahunche

hum to ruswa the magar un ki nazar bhi na bachi

hum pe aae hue ilzam kahan tak pahunche

mutmain garmi-e-ehsas-e-jafa se bhi nahin

dil ko pahunche bhi to aaram kahan tak pahunche

un ki aankhon ko diye the jo meri aankhon ne

kis se puchhun ki wo paigham kahan tak pahunche