saya na jis ka aaya kabhi mere aas-pas

saaya na jis kā aaya kabhī mere ās-pās

rahne lagā hai aaj vahī mere ās-pās

miltā nahīñ hai mujh ko ḳhushī kā koī surāġh

phailī huī hai sirf ġhamī mere ās-pās

jis ne diyā hai mujh ko har ik moḌ par fareb

vo yaar phir rahā hai abhī mere ās-pās

tū jo bichhaḌ gayā hai to ye zindagī mirī

bikhrī paḌī hai TuuTī huī mere ās-pās

aa.e na koī dil ke nihāñ-ḳhāne meñ mire

ranj-o-alam bahut haiñ abhī mere ās-pās

shāyad kisī kī lag ga.ī 'ādil-hirā’ nazar

rahtī nahīñ hai koī ḳhushī mere ās-pās

saya na jis ka aaya kabhi mere aas-pas

rahne laga hai aaj wahi mere aas-pas

milta nahin hai mujh ko KHushi ka koi suragh

phaili hui hai sirf ghami mere aas-pas

jis ne diya hai mujh ko har ek moD par fareb

wo yar phir raha hai abhi mere aas-pas

tu jo bichhaD gaya hai to ye zindagi meri

bikhri paDi hai TuTi hui mere aas-pas

aae na koi dil ke nihan-KHane mein mere

ranj-o-alam bahut hain abhi mere aas-pas

shayad kisi ki lag gai 'adil-hira’ nazar

rahti nahin hai koi KHushi mere aas-pas