saya tha mera aur mere shaidaiyon mein tha

saaya thā merā aur mire shaidā.iyoñ meñ thā

ik anjuman sā vo mirī tanhā.iyoñ meñ thā

chhantī thī shab ko chāñdnī bādal kī oT se

paikar kā is ke aks sā parchhā.iyoñ meñ thā

koyal kī kuuk bhī na javāb is kā ho sakī

lahrā tire gale kā jo shahnā.iyoñ meñ thā

jis dam mirī imārat-e-dil sho.ala-posh thī

maiñ ne sunā ki vo bhī tamāshā.iyoñ meñ thā

uTThā usī se ziist ke ehsās kā ḳhamīr

jo dard-e-dil ke zaḳhm kī pahnā.iyoñ meñ thā

jab shahr meñ fasād huā to amīr-e-shahr

dekhā gayā ki aap hī balvā.i.oñ meñ thā

behad hasīn thā magar 'āzar' mujhe to bas

yaad is qadar rahā ki vo harjā.iyoñ meñ thā

saya tha mera aur mere shaidaiyon mein tha

ek anjuman sa wo meri tanhaiyon mein tha

chhanti thi shab ko chandni baadal ki oT se

paikar ka is ke aks sa parchhaiyon mein tha

koyal ki kuk bhi na jawab is ka ho saki

lahra tere gale ka jo shahnaiyon mein tha

jis dam meri imarat-e-dil shoala-posh thi

main ne suna ki wo bhi tamashaiyon mein tha

uTTha usi se zist ke ehsas ka KHamir

jo dard-e-dil ke zaKHm ki pahnaiyon mein tha

jab shahr mein fasad hua to amir-e-shahr

dekha gaya ki aap hi balwaion mein tha

behad hasin tha magar 'azar' mujhe to bas

yaad is qadar raha ki wo harjaiyon mein tha