saz-e-dil saz-e-junun saz-e-wafa kuchh bhi nahin

sāz-e-dil sāz-e-junūñ sāz-e-vafā kuchh bhī nahīñ

vo na hoñ paas to jiine kā maza kuchh bhī nahīñ

jiine vāloñ ke liye is kī baḌī qīmat hai

marne vāloñ ke liye āb-e-baqā kuchh bhī nahīñ

maslahat kahtī hai logoñ se ki mere ghar meñ

is tarah aag lagī hai ki jalā kuchh bhī nahīñ

un ke hāthoñ meñ hai taqdīr jahāñ dīvāne

tere hāthoñ meñ lakīroñ ke sivā kuchh bhī nahīñ

be-ḳhatā aise bhī dekhe haiñ jahāñ meñ tum ne

hai ḳhatā jin kā ye kahnā ki ḳhatā kuchh bhī nahīñ

jab se majrūh huī lazzat-e-ehsās-e-alam

dard meñ ġham meñ taḌapne meñ mazā kuchh bhī nahīñ

kyā batā.eñ ki ġham-e-dil ke alāva 'shāhid'

ham ko is shahr-e-nigārāñ se milā kuchh bhī nahīñ

saz-e-dil saz-e-junun saz-e-wafa kuchh bhi nahin

wo na hon pas to jine ka maza kuchh bhi nahin

jine walon ke liye is ki baDi qimat hai

marne walon ke liye aab-e-baqa kuchh bhi nahin

maslahat kahti hai logon se ki mere ghar mein

is tarah aag lagi hai ki jala kuchh bhi nahin

un ke hathon mein hai taqdir jahan diwane

tere hathon mein lakiron ke siwa kuchh bhi nahin

be-KHata aise bhi dekhe hain jahan mein tum ne

hai KHata jin ka ye kahna ki KHata kuchh bhi nahin

jab se majruh hui lazzat-e-ehsas-e-alam

dard mein gham mein taDapne mein maza kuchh bhi nahin

kya bataen ki gham-e-dil ke alawa 'shahid'

hum ko is shahr-e-nigaran se mila kuchh bhi nahin