saz-e-hasti pe abhi jhum ke ga le mujhko

sāz-e-hastī pe abhī jhuum ke gā le mujh ko

zindagī se ye kaho aur na Taale mujh ko

maiñ ne to sub.h-e-daraḳhshāñ kī duā māñgī thī

kyuuñ mile zard charāġhoñ ke ujāle mujh ko

tujh ko paane ke liye umar gañvā dī maiñ ne

haq to bantā hai ki tū apnā banā le mujh ko

ye to saaqī kī jagah aur koī baiThā hai

ye jo gin gin ke pilātā hai piyāle mujh ko

maiñ zamāne ke jhameloñ meñ dhañsā jaatā huuñ

us se kahiye ki vo daldal se nikāle mujh ko

apnī ḳhāmosh tamannā kī aziyyat se nikal

jo sunānā hai zarā khul ke sunā le mujh ko

nā-tavānī hī mirī tāb-o-tavāñ hai 'ādil'

maiñ ne kab tujh se kahā thā ki bachā le mujh ko

saz-e-hasti pe abhi jhum ke ga le mujh ko

zindagi se ye kaho aur na Tale mujh ko

main ne to subh-e-daraKHshan ki dua mangi thi

kyun mile zard charaghon ke ujale mujh ko

tujh ko pane ke liye umar ganwa di main ne

haq to banta hai ki tu apna bana le mujh ko

ye to saqi ki jagah aur koi baiTha hai

ye jo gin gin ke pilata hai piyale mujh ko

main zamane ke jhamelon mein dhansa jata hun

us se kahiye ki wo daldal se nikale mujh ko

apni KHamosh tamanna ki aziyyat se nikal

jo sunana hai zara khul ke suna le mujh ko

na-tawani hi meri tab-o-tawan hai 'adil'

main ne kab tujh se kaha tha ki bacha le mujh ko