saz-e-jaan par gham ki jab naghma-zani hoti nahin

sāz-e-jāñ par ġham kī jab naġhma-zanī hotī nahīñ

dil kī dhaḌkan tarjumān-e-zindagī hotī nahīñ

yā tavajjoh hī nigāh-e-husn kī hotī nahīñ

yā ye kahiye merī hairat meñ kamī hotī nahīñ

yuuñ mirā afsāna-e-ġham nā-mukammal rah gayā

jaise takmīl-e-mazāq-e-'āshiqī hotī nahīñ

haañ kabhī ġham bhī nazar aatā thā ham-rang-e-ḳhushī

ab ḳhushī ke vaqt bhī dil ko ḳhushī hotī nahīñ

haa.e vo aañsū jo dil kī aag bhaḌkāte rahe

uf vo soz-e-mustaqil jis meñ kamī hotī nahīñ

dekhnā ye intihā-e-vaz'-dārī dekhnā

māne'-e-ādāb-e-ulfat be-ḳhudī hotī nahīñ

dil kī betābi ab is manzil pe le aa.ī mujhe

jis jagah haa.il ḳhudī-o-be-ḳhudī hotī nahīñ

kyoñ mirī laġhzish ko nādānī kā tā'na dījiye

'ishq hotā hai to ‘aql-o-āgahī hotī nahīñ

jaane kin nazroñ se dekhā thā 'hazīñ' ko aap ne

aaj tak betābī-e-dil meñ kamī hotī nahīñ

saz-e-jaan par gham ki jab naghma-zani hoti nahin

dil ki dhaDkan tarjuman-e-zindagi hoti nahin

ya tawajjoh hi nigah-e-husn ki hoti nahin

ya ye kahiye meri hairat mein kami hoti nahin

yun mera afsana-e-gham na-mukammal rah gaya

jaise takmil-e-mazaq-e-'ashiqi hoti nahin

han kabhi gham bhi nazar aata tha ham-rang-e-KHushi

ab KHushi ke waqt bhi dil ko KHushi hoti nahin

hae wo aansu jo dil ki aag bhaDkate rahe

uf wo soz-e-mustaqil jis mein kami hoti nahin

dekhna ye intiha-e-waz'-dari dekhna

mane'-e-adab-e-ulfat be-KHudi hoti nahin

dil ki betabi ab is manzil pe le aai mujhe

jis jagah hail KHudi-o-be-KHudi hoti nahin

kyon meri laghzish ko nadani ka ta'na dijiye

'ishq hota hai to ‘aql-o-agahi hoti nahin

jaane kin nazron se dekha tha 'hazin' ko aap ne

aaj tak betabi-e-dil mein kami hoti nahin