saz ke maujon pe naghmon ki sawari main thi

saaz ke maujoñ pe naġhmoñ kī savārī maiñ thī

bhairvī ban ke lab-e-sub.h pe jaarī maiñ thī

maiñ jo rotī thī mirā chehra nikhar jaatā thā

āñsuoñ ke liye phūloñ kī kiyārī maiñ thī

giit ban jaatī kabhī aur kabhī aañsū bantī

kabhī hoñToñ se kabhī āñkhoñ se jaarī maiñ thī

jaan denā to baḌī chiiz hai dil bhī na diyā

tū to kahtā thā tujhe jaan se pyārī maiñ thī

maiñ harī shāḳh thī garche kabhī phūlī na phalī

tum se bhī TuuT ga.ī garche tumhārī maiñ thī

tū ne kuchh qadr na kī ye baḌā nuqsān huā

tere gulshan ke liye fasl-e-bahārī maiñ thī

mujh se dekhā na gayā terā pareshāñ honā

ishq kī baazī samajh-būjh ke haarī maiñ thī

ye jo 'anjum' kī hai barbādī kā qissa mash.hūr

haa.e vo shāmat-e-a.amāl kī maarī maiñ thī

saz ke maujon pe naghmon ki sawari main thi

bhairwi ban ke lab-e-subh pe jari main thi

main jo roti thi mera chehra nikhar jata tha

aansuon ke liye phulon ki kiyari main thi

git ban jati kabhi aur kabhi aansu banti

kabhi honTon se kabhi aankhon se jari main thi

jaan dena to baDi chiz hai dil bhi na diya

tu to kahta tha tujhe jaan se pyari main thi

main hari shaKH thi garche kabhi phuli na phali

tum se bhi TuT gai garche tumhaari main thi

tu ne kuchh qadr na ki ye baDa nuqsan hua

tere gulshan ke liye fasl-e-bahaari main thi

mujh se dekha na gaya tera pareshan hona

ishq ki bazi samajh-bujh ke haari main thi

ye jo 'anjum' ki hai barbaadi ka qissa mashhur

hae wo shamat-e-amal ki mari main thi