sazishen thin biphar gaya pani

sāzisheñ thiiñ biphar gayā paanī

maiñ jo Duubā utar gayā paanī

narm lahje se kāTiye patthar

ye sikhā ke hunar gayā paanī

pāniyoñ ko bhī kaaT de ye kaTār

is siyāsat se Dar gayā paanī

ek sahmī huī sī machhlī hai

kaise paanī se Dar gayā paanī

māriye haath pair jaan bache

ab to sar se guzar gayā paanī

dafn sāgar meñ ho gayā dariyā

yuuñ to apne hī ghar gayā paanī

jal rahe ghar kī baat aa.ī to

phir zabāñ se mukar gayā paanī

duub kī nok pe hai motī sā

yuuñ palak pe Thahar gayā paanī

kashtiyāñ jab duā.eñ karne lagīñ

rafta rafta utar gayā paanī

kitne parbat Dubo ke aayā thā

ek tinke se Dar gayā paanī

phir vo muḌ kar kabhī nahīñ aayā

jo puloñ se guzar gayā paanī

yuuñ to chhalkā hai terī āñkhoñ se

merī āñkhoñ meñ bhar gayā paanī

maiñ tere hī badan kā hissa huuñ

aag se bol kar gayā paanī

ek badlī baras paḌī jo 'ḳhayāl'

dekh phir dar-ba-dar gayā paanī

sazishen thin biphar gaya pani

main jo Duba utar gaya pani

narm lahje se kaTiye patthar

ye sikha ke hunar gaya pani

paniyon ko bhi kaT de ye kaTar

is siyasat se Dar gaya pani

ek sahmi hui si machhli hai

kaise pani se Dar gaya pani

mariye hath pair jaan bache

ab to sar se guzar gaya pani

dafn sagar mein ho gaya dariya

yun to apne hi ghar gaya pani

jal rahe ghar ki baat aai to

phir zaban se mukar gaya pani

dub ki nok pe hai moti sa

yun palak pe Thahar gaya pani

kashtiyan jab duaen karne lagin

rafta rafta utar gaya pani

kitne parbat Dubo ke aaya tha

ek tinke se Dar gaya pani

phir wo muD kar kabhi nahin aaya

jo pulon se guzar gaya pani

yun to chhalka hai teri aankhon se

meri aankhon mein bhar gaya pani

main tere hi badan ka hissa hun

aag se bol kar gaya pani

ek badli baras paDi jo 'KHayal'

dekh phir dar-ba-dar gaya pani