sab faisle KHilaf hamare gae to kya

sab faisle ḳhilāf hamāre ga.e to kyā

ham be-gunāh jaan se maare ga.e to kyā

ye kam nahīñ ki yaad hī rakkhā gayā hameñ

mahfil meñ sab ke baa'd pukāre ga.e to kyā

paanī tamām sahn kā jab pī ga.ī zamīn

kāġhaz ke ab safīne utāre ga.e to kyā

tum bevafā ho kaun yahāñ jāntā nahīñ

tum bevafā na kah ke pukāre ga.e to kyā

raunaq na kam huī kabhī us bazm-e-nāz kī

kuchh kahkashāñ se Tuut ke taare ga.e to kyā

ḳhatre meñ aaj bhī hai yaqīñ kā mire vajūd

kuchh saañp āstīn ke maare ga.e to kyā

jannat nahīñ milī hai yahī jānte haiñ ham

jannat ke sāmne se guzāre ga.e to kyā

maiñ bhī shikār-e-‘ishq hī ke sānehe meñ huuñ

is hādse meñ aap bhī maare ga.e to kyā

sab faisle KHilaf hamare gae to kya

hum be-gunah jaan se mare gae to kya

ye kam nahin ki yaad hi rakkha gaya hamein

mahfil mein sab ke ba'd pukare gae to kya

pani tamam sahn ka jab pi gai zamin

kaghaz ke ab safine utare gae to kya

tum bewafa ho kaun yahan jaanta nahin

tum bewafa na kah ke pukare gae to kya

raunaq na kam hui kabhi us bazm-e-naz ki

kuchh kahkashan se Tut ke tare gae to kya

KHatre mein aaj bhi hai yaqin ka mere wajud

kuchh sanp aastin ke mare gae to kya

jannat nahin mili hai yahi jaante hain hum

jannat ke samne se guzare gae to kya

main bhi shikar-e-‘ishq hi ke sanehe mein hun

is hadse mein aap bhi mare gae to kya