sab hain masruf kisi ko yahan fursat nahin hai

sab haiñ masrūf kisī ko yahāñ fursat nahīñ hai

sab zarūrat hai magar kār-e-zarūrat nahīñ hai

tujh se dushnām-tarāzoñ kī himāyat ke liye

ab mire paas koī harf-e-suhūlat nahīñ hai

roz ik hashr bapā karte the jis kī ḳhātir

ham ye sunte haiñ ki vo fitna-e-qāmat nahīñ hai

aks-e-ram-sāzī-e-vahshat se use hai nisbat

ab to ā.īnoñ ko pahlī sī vo hairat nahīñ hai

kis liye tark-e-ta.alluq pe nadāmat hai tujhe

ai mirī jaan mujhe koī shikāyat nahīñ hai

raqs-e-āshob 'ajab dekhā hai galiyoñ meñ tirī

ai mire shahr yahāñ koī salāmat nahīñ hai

hukm hai ḳhāna-e-vahshat ke makīnoñ se kaho

ab yahāñ saañs bhī lene kī ijāzat nahīñ hai

ḳhūñ-bahā māñgne vāloñ ko nadāmat hai bahut

mere qātil ko magar koī nadāmat nahīñ hai

ramz-o-asrār se ḳhālī nahīñ hote mire sher

ye alag baat ki 'shāhid' ko vo shohrat nahīñ hai

sab hain masruf kisi ko yahan fursat nahin hai

sab zarurat hai magar kar-e-zarurat nahin hai

tujh se dushnam-taraazon ki himayat ke liye

ab mere pas koi harf-e-suhulat nahin hai

roz ek hashr bapa karte the jis ki KHatir

hum ye sunte hain ki wo fitna-e-qamat nahin hai

aks-e-ram-sazi-e-wahshat se use hai nisbat

ab to aainon ko pahli si wo hairat nahin hai

kis liye tark-e-talluq pe nadamat hai tujhe

ai meri jaan mujhe koi shikayat nahin hai

raqs-e-ashob 'ajab dekha hai galiyon mein teri

ai mere shahr yahan koi salamat nahin hai

hukm hai KHana-e-wahshat ke makinon se kaho

ab yahan sans bhi lene ki ijazat nahin hai

KHun-baha mangne walon ko nadamat hai bahut

mere qatil ko magar koi nadamat nahin hai

ramz-o-asrar se KHali nahin hote mere sher

ye alag baat ki 'shahid' ko wo shohrat nahin hai