sab isko usko rote hain apni wafa ko main

sab is ko us ko rote haiñ apnī vafā ko maiñ

har baar bhuul jaatī huuñ us kī ḳhatā ko maiñ

dil meñ 'ajīb hotī hai ḳhvāhish kabhī kabhī

bikhrā duuñ us ke shānoñ pe kaalī ghaTā ko maiñ

is dil ke ābgīne ko toḌe na phir koī

dānista yaad kartī huuñ us bevafā ko maiñ

khātī hai vo shikast mire hausle se roz

detī huuñ muskurā ke jo dā'vat qazā ko maiñ

merī samā'atoñ se jo Takrātī thī kabhī

bhūlī nahīñ huuñ aaj talak us sadā ko maiñ

tūfāñ meñ Duub jaatī haiñ kitnī hī kashtiyāñ

kaise ḳhudā banā duuñ kisī nāḳhudā ko maiñ

'farzāna' jis kā naam hai vahshat ke shahr meñ

dil se salām kartī huuñ us shā’era ko maiñ

sab is ko us ko rote hain apni wafa ko main

har bar bhul jati hun us ki KHata ko main

dil mein 'ajib hoti hai KHwahish kabhi kabhi

bikhra dun us ke shanon pe kali ghaTa ko main

is dil ke aabgine ko toDe na phir koi

danista yaad karti hun us bewafa ko main

khati hai wo shikast mere hausle se roz

deti hun muskura ke jo da'wat qaza ko main

meri sama'aton se jo Takraati thi kabhi

bhuli nahin hun aaj talak us sada ko main

tufan mein Dub jati hain kitni hi kashtiyan

kaise KHuda bana dun kisi naKHuda ko main

'farzana' jis ka nam hai wahshat ke shahr mein

dil se salam karti hun us sha’era ko main