sab jaante hue bhi wo anjaan ban gaya

sab jānte hue bhī vo anjān ban gayā

dānā.iyāñ sameT ke nādān ban gayā

yuuñ to hazāroñ log the maujūd shahr meñ

us kā vajūd shahr kī pahchān ban gayā

kuchh is tarah se sar kiyā hai merī zaat ko

merī kitāb-e-zīst kā unvān ban gayā

zulm-o-sitam ke us kī zarā intihā to dekh

jo kuchh zabāñ se niklā vo farmān ban gayā

ab is jahāñ meñ rahnā bhī mumkin nahīñ rahā

āḳhir ko ye bhī jang kā maidān ban gayā

bārūd se na bach sakā vo ḳhud bhī ai 'nazar'

ye khel us kī maut kā sāmān ban gayā

sab jaante hue bhi wo anjaan ban gaya

danaiyan sameT ke nadan ban gaya

yun to hazaron log the maujud shahr mein

us ka wajud shahr ki pahchan ban gaya

kuchh is tarah se sar kiya hai meri zat ko

meri kitab-e-zist ka unwan ban gaya

zulm-o-sitam ke us ki zara intiha to dekh

jo kuchh zaban se nikla wo farman ban gaya

ab is jahan mein rahna bhi mumkin nahin raha

aaKHir ko ye bhi jang ka maidan ban gaya

barud se na bach saka wo KHud bhi ai 'nazar'

ye khel us ki maut ka saman ban gaya