sab jit kar bhi mat se aage nahin gaya

sab jiit kar bhī maat se aage nahīñ gayā

vo shaḳhs merī zaat se aage nahīñ gayā

nā-mumkināt se hī thā āġhāz-e-zindagī

buzdil to mumkināt se aage nahīñ gayā

Thahrā hai vaqt aaj bhī bichhḌe the ham jahāñ

ik pal bhī ġham kī raat se aage nahīñ gayā

umroñ kā intizār vo jholī meñ Daal kar

do-chār pal ke saath se aage nahīñ gayā

ġham hijr kā hai yā use shauq-e-visāl hai

insāñ ġham-e-hayāt se aage nahīñ gayā

jitne lage haiñ zaḳhm mire dostoñ ke haiñ

dushman to sirf ghaat se aage nahīñ gayā

miTTī ke haath ishq kī miTTī palīd hai

tū bhī havas kī baat se aage nahīñ gayā

hāthoñ meñ haath Daal ke jaanā thā chāñd par

afsos chāñd-rāt se aage nahīñ gayā

maiñ duur se hī dekh ke ḳhush ho ga.ī use

aur vo bhī ḳhvāhishāt se aage nahīñ gayā

sab jit kar bhi mat se aage nahin gaya

wo shaKHs meri zat se aage nahin gaya

na-mumkinat se hi tha aaghaz-e-zindagi

buzdil to mumkinat se aage nahin gaya

Thahra hai waqt aaj bhi bichhDe the hum jahan

ek pal bhi gham ki raat se aage nahin gaya

umron ka intizar wo jholi mein Dal kar

do-chaar pal ke sath se aage nahin gaya

gham hijr ka hai ya use shauq-e-visal hai

insan gham-e-hayat se aage nahin gaya

jitne lage hain zaKHm mere doston ke hain

dushman to sirf ghat se aage nahin gaya

miTTi ke hath ishq ki miTTi palid hai

tu bhi hawas ki baat se aage nahin gaya

hathon mein hath Dal ke jaana tha chand par

afsos chand-raat se aage nahin gaya

main dur se hi dekh ke KHush ho gai use

aur wo bhi KHwahishat se aage nahin gaya