sab kaenat-e-husn ka hasil liye hue

sab kā.enāt-e-husn kā hāsil liye hue

baiThā huuñ dil meñ ishq kī mahfil liye hue

ik ik nazar farebī-e-sāhil liye hue

har mauj sāmne hai mirā dil liye hue

sarmāya-e-nashāt ġham-e-dil liye hue

huuñ ya.anī kaif-e-ishq kā hāsil liye hue

phir kashtī-e-hayāt hai girdāb-e-ġham ke saath

tūfān-e-be-niyāzī-e-sāhil liye hue

jī chāhtā hai thak ke kahīñ baiTh jā.iye

āġhosh-e-pā-e-shauq meñ manzil liye hue

jab lutf hai ki maiñ bhī rahūñ apne hosh meñ

aao mirī nigāh mirā dil liye hue

vo mast-o-mahv apne faroġh-e-nashāt meñ

maiñ mutma.in huuñ dard bharā dil liye hue

ai qais-e-dīd apne hijāboñ se hoshiyār

har parda-e-nigāh hai mahmil liye hue

mujh par bhī kuchh karam nigah-e-neshtar-navāz

maiñ bhī huuñ ek dard bharā dil liye hue

'bāsit' kisī jihat se na ho āshnā magar

halkā sā ik tasavvur-e-manzil liye hue

sab kaenat-e-husn ka hasil liye hue

baiTha hun dil mein ishq ki mahfil liye hue

ek ek nazar farebi-e-sahil liye hue

har mauj samne hai mera dil liye hue

sarmaya-e-nashat gham-e-dil liye hue

hun yani kaif-e-ishq ka hasil liye hue

phir kashti-e-hayat hai girdab-e-gham ke sath

tufan-e-be-niyazi-e-sahil liye hue

ji chahta hai thak ke kahin baiTh jaiye

aaghosh-e-pa-e-shauq mein manzil liye hue

jab lutf hai ki main bhi rahun apne hosh mein

aao meri nigah mera dil liye hue

wo mast-o-mahw apne farogh-e-nashat mein

main mutmain hun dard bhara dil liye hue

ai qais-e-did apne hijabon se hoshiyar

har parda-e-nigah hai mahmil liye hue

mujh par bhi kuchh karam nigah-e-neshtar-nawaz

main bhi hun ek dard bhara dil liye hue

'basit' kisi jihat se na ho aashna magar

halka sa ek tasawwur-e-manzil liye hue