sab ko miT jaana hai taqwim-e-fana kya dekhun

sab ko miT jaanā hai taqvīm-e-fanā kyā dekhūñ

zindagī kyuuñ na tirā husn-e-dil-ārā dekhūñ

dil-e-pur-ḳhūñ ko to mil jaa.e farāġh-e-ishrat

kab talak dard se us kā maiñ taḌaptā dekhūñ

maiñ ki huuñ kushta-e-naumīdī-e-jāved kabhī

apnī mauhūm ummīdoñ kā bar-ānā dekhūñ

zindagī koī ma.ānī koī matlab to ho

ye na ho qāfila-e-jāñ kā guzarnā dekhūñ

sub.h se shaam talak dhuup hī oḌhī maiñ ne

koī dam ab to maiñ bādal kā barasnā dekhūñ

yuuñ to tābānī-e-duniyā pe nazar ruktī nahīñ

ye na ho chehra-e-insāñ ko maiñ utrā dekhūñ

ġharq ho jā.ūñgā apne meñ vo dariyā maiñ huuñ

kab talak raahī samundar kā ishārā dekhūñ

sab ko miT jaana hai taqwim-e-fana kya dekhun

zindagi kyun na tera husn-e-dil-ara dekhun

dil-e-pur-KHun ko to mil jae faragh-e-ishrat

kab talak dard se us ka main taDapta dekhun

main ki hun kushta-e-naumidi-e-jawed kabhi

apni mauhum ummidon ka bar-ana dekhun

zindagi koi maani koi matlab to ho

ye na ho qafila-e-jaan ka guzarna dekhun

subh se sham talak dhup hi oDhi main ne

koi dam ab to main baadal ka barasna dekhun

yun to tabani-e-duniya pe nazar rukti nahin

ye na ho chehra-e-insan ko main utra dekhun

gharq ho jaunga apne mein wo dariya main hun

kab talak rahi samundar ka ishaara dekhun