sab ko wahshat hai meri wahshat ke saman dekh kar

sab ko vahshat hai mirī vahshat ke sāmāñ dekh kar

chāk-dāmāñ dekh kar chāk-e-garebāñ dekh kar

be-ḳhabar kāñToñ se thā ahl-e-mohabbat kā shu.ūr

paañv rakhne the zamīn-e-kū-e-jānāñ dekh kar

allāh allāh jazba-e-ulfat kī mo.ajiz-kāriyāñ

vo pareshāñ ho ga.e mujh ko pareshāñ dekh kar

yaad aayā phir mujhe afsāna-e-tūr-o-kalīm

ik tajallī sī tire aariz pe raqsāñ dekh kar

chāragar ab mujh se merī lazzat-e-īzā na pūchh

ḳhanda-zan hote haiñ zaḳhm-e-dil namakdāñ dekh kar

hai mohabbat kā agar donoñ taraf yaksāñ asar

vo pareshāñ kyuuñ nahīñ mujh ko pareshāñ dekh kar

is meñ muzmar haiñ bahut naġhme hayāt-e-ishq ke

chheḌ mizrāb-e-junūñ sāz-e-rag-e-jāñ dekh kar

is junūñ kā chāragar ab aur hī kuchh kar ilaaj

aur vahshat baḌh chalī hai kunj-e-zindāñ dekh kar

vā nahīñ hotā lab-e-shikva sar-e-mahshar 'ra.īs'

apne sar par ḳhanjar-e-qātil kā ehsāñ dekh kar

sab ko wahshat hai meri wahshat ke saman dekh kar

chaak-daman dekh kar chaak-e-gareban dekh kar

be-KHabar kanTon se tha ahl-e-mohabbat ka shuur

panw rakhne the zamin-e-ku-e-jaanan dekh kar

allah allah jazba-e-ulfat ki moajiz-kariyan

wo pareshan ho gae mujh ko pareshan dekh kar

yaad aaya phir mujhe afsana-e-tur-o-kalim

ek tajalli si tere aariz pe raqsan dekh kar

chaaragar ab mujh se meri lazzat-e-iza na puchh

KHanda-zan hote hain zaKHm-e-dil namakdan dekh kar

hai mohabbat ka agar donon taraf yaksan asar

wo pareshan kyun nahin mujh ko pareshan dekh kar

is mein muzmar hain bahut naghme hayat-e-ishq ke

chheD mizrab-e-junun saz-e-rag-e-jaan dekh kar

is junun ka chaaragar ab aur hi kuchh kar ilaj

aur wahshat baDh chali hai kunj-e-zindan dekh kar

wa nahin hota lab-e-shikwa sar-e-mahshar 'rais'

apne sar par KHanjar-e-qatil ka ehsan dekh kar