sab kuchh sar-e-bazar jahan chhoD gaya hai

sab kuchh sar-e-bāzār jahāñ chhoḌ gayā hai

ye kaun khulī apnī dukāñ chhoḌ gayā hai

jaate hī kisī ke na vo naġhma na ujālā

ḳhāmosh charāġhoñ kā dhuāñ chhoḌ gayā hai

vahshī to gayā le ke vo zanjīr-o-garebāñ

ik nauha-kunāñ ḳhālī makāñ chhoḌ gayā hai

sau qāfile is raah se aa.e bhī ga.e bhī

ab tak maiñ vahīñ huuñ vo jahāñ chhoḌ gayā hai

bhejā hai ye kis ne varaq-e-sāda mire naam

kyā kyā gile be-lafz-o-bayāñ chhoḌ gayā hai

tā-dūr jahāñ ab se sar-e-rāh charāġhāñ

vo naqsh-e-qadam apne vahāñ chhoḌ gayā hai

uTh kar tirī mahfil se gayā hai jo muġhannī

naġhmāt ke parde meñ fuġhāñ chhoḌ gayā hai

be-samt sā ik aaj ki maazī hai na fardā

ye vaqt kā sailāb kahāñ chhoḌ gayā hai

pahlū meñ kahāñ dil jo sambhāle koī 'naushād'

ik daaġh kī sūrat meñ nishāñ chhoḌ gayā hai

sab kuchh sar-e-bazar jahan chhoD gaya hai

ye kaun khuli apni dukan chhoD gaya hai

jate hi kisi ke na wo naghma na ujala

KHamosh charaghon ka dhuan chhoD gaya hai

wahshi to gaya le ke wo zanjir-o-gareban

ek nauha-kunan KHali makan chhoD gaya hai

sau qafile is rah se aae bhi gae bhi

ab tak main wahin hun wo jahan chhoD gaya hai

bheja hai ye kis ne waraq-e-sada mere nam

kya kya gile be-lafz-o-bayan chhoD gaya hai

ta-dur jahan ab se sar-e-rah charaghan

wo naqsh-e-qadam apne wahan chhoD gaya hai

uTh kar teri mahfil se gaya hai jo mughanni

naghmat ke parde mein fughan chhoD gaya hai

be-samt sa ek aaj ki mazi hai na farda

ye waqt ka sailab kahan chhoD gaya hai

pahlu mein kahan dil jo sambhaale koi 'naushad'

ek dagh ki surat mein nishan chhoD gaya hai