sab madari hain tamasha bhi hai koi koi

sab madārī haiñ tamāshā bhī hai koī koī

ab unheñ dekhne vaalā bhī hai koī koī

merī ḳhāmoshī ko tanhā.ī samajhne vaalo

mahfil-e-dil meñ to aatā bhī hai koī koī

surḳh miTTī meñ gire aañsū bane haiñ motī

ḳhaak se DhūñDh ke laatā bhī hai koī koī

hañste hañste hue aañsū bhī nikal aate haiñ

rote rote hue hañstā bhī hai koī koī

chhoḌ jaatā hai to jaa.e ye hujūm-e-duniyā

majma.a-e-ġhair se aayā bhī hai koī koī

'mīr' to miir hai sāhab to nahīñ hai sāhab

'mīr' ke daur meñ saudā bhī hai koī koī

terī duniyā meñ mirā zikr rahegā 'manzar'

sūrat-e-sher meñ dekhā bhī hai koī koī

sab madari hain tamasha bhi hai koi koi

ab unhen dekhne wala bhi hai koi koi

meri KHamoshi ko tanhai samajhne walo

mahfil-e-dil mein to aata bhi hai koi koi

surKH miTTi mein gire aansu bane hain moti

KHak se DhunDh ke lata bhi hai koi koi

hanste hanste hue aansu bhi nikal aate hain

rote rote hue hansta bhi hai koi koi

chhoD jata hai to jae ye hujum-e-duniya

majma-e-ghair se aaya bhi hai koi koi

'mir' to mir hai sahab to nahin hai sahab

'mir' ke daur mein sauda bhi hai koi koi

teri duniya mein mera zikr rahega 'manzar'

surat-e-sher mein dekha bhi hai koi koi