sab purana hai phir naya kya hai

sab purānā hai phir nayā kyā hai

bas ye dekheñ ki kaam kā kyā hai

sirf jalne kī aa rahī hai bū

ye to jāneñ ki jal rahā kyā hai

ik 'ajab be-hisī meñ simTī hai

apnī duniyā tujhe huā kyā hai

tai kiyā ham ne ik tavīl safar

ibtidā hai ye intihā kyā hai

har koī DhūñDhtā hī phirtā hai

sab kā duniyā meñ kho gayā kyā hai

kaam kiije to baat bantī hai

naam hotā hai naam kā kyā hai

āsmāñ kah rahā hai apnī baat

ai zamīñ terā tajraba kyā hai

merī duniyā tujhe ḳhabar bhī hai

ahl-e-dil kā mutālba kyā hai

kitnī sadiyoñ se sah rahī hai 'azāb

har na.ī nasl kī ḳhatā kyā hai

sab purana hai phir naya kya hai

bas ye dekhen ki kaam ka kya hai

sirf jalne ki aa rahi hai bu

ye to jaanen ki jal raha kya hai

ek 'ajab be-hisi mein simTi hai

apni duniya tujhe hua kya hai

tai kiya hum ne ek tawil safar

ibtida hai ye intiha kya hai

har koi DhunDhta hi phirta hai

sab ka duniya mein kho gaya kya hai

kaam kije to baat banti hai

nam hota hai nam ka kya hai

aasman kah raha hai apni baat

ai zamin tera tajraba kya hai

meri duniya tujhe KHabar bhi hai

ahl-e-dil ka mutalba kya hai

kitni sadiyon se sah rahi hai 'azab

har nai nasl ki KHata kya hai