sab tafraqe aapas ke miTa kyon nahin dete

sab tafraqe aapas ke miTā kyoñ nahīñ dete

nafrat kī ye dīvār girā kyoñ nahīñ dete

haq jiine kā duniyā meñ sabhī ko hai barābar

har ek ko jiine kī duā kyoñ nahīñ dete

rah rah ke chhalak paḌte haiñ in āñkhoñ se aañsū

tum dil se mirī yaad miTā kyoñ nahīñ dete

jo dil meñ utar jaatī hai ik tiir kī sūrat

yā-rab mujhe vo ḳhaas adā kyoñ nahīñ dete

tanqīd to karte ho mire tarz-e-amal par

jiine ke tum andāz sikhā kyoñ nahīñ dete

jis se hameñ hāsil ho masarrat bhī sukūñ bhī

ai murshid-e-pāk aisī duā kyoñ nahīñ dete

ai 'shāz' ta.assub kā miTe jis se añdherā

tum pyaar kī vo sham.a jalā kyoñ nahīñ dete

sab tafraqe aapas ke miTa kyon nahin dete

nafrat ki ye diwar gira kyon nahin dete

haq jine ka duniya mein sabhi ko hai barabar

har ek ko jine ki dua kyon nahin dete

rah rah ke chhalak paDte hain in aankhon se aansu

tum dil se meri yaad miTa kyon nahin dete

jo dil mein utar jati hai ek tir ki surat

ya-rab mujhe wo KHas ada kyon nahin dete

tanqid to karte ho mere tarz-e-amal par

jine ke tum andaz sikha kyon nahin dete

jis se hamein hasil ho masarrat bhi sukun bhi

ai murshid-e-pak aisi dua kyon nahin dete

ai 'shaz' tassub ka miTe jis se andhera

tum pyar ki wo shama jala kyon nahin dete