sabab bane jo meri KHushi ka to main usi ka

sabab bane jo mirī ḳhushī kā to maiñ usī kā

yā koī paikar ho sādgī kā to maiñ usī kā

sharāb-o-sāqī ye jām-o-mīnā nahīñ zarūrī

jo aañkh de lutf mai-kashī kā to maiñ usī kā

na hai taḳhayyul na hai taġhazzul mire suḳhan meñ

ho fikr-o-fan jis meñ shā'irī kā to maiñ usī kā

yahāñ to sab ke haiñ ham-piyāla-o-ham-nivāla

abhī talak jo nahīñ kisī kā to maiñ usī kā

baḌā hai qad aap kā maiñ adnā mu'āf kiije

milegā koī barābarī kā to maiñ usī kā

anā ke ghar se nikal ke bāhar mirī taraf jo

baḌhā.egā haath dostī kā to maiñ usī kā

udāsiyoñ ke haiñ ghup añdhere 'anīs' dil meñ

darīcha khole jo raushnī kā to maiñ usī kā

sabab bane jo meri KHushi ka to main usi ka

ya koi paikar ho sadgi ka to main usi ka

sharab-o-saqi ye jam-o-mina nahin zaruri

jo aankh de lutf mai-kashi ka to main usi ka

na hai taKHayyul na hai taghazzul mere suKHan mein

ho fikr-o-fan jis mein sha'iri ka to main usi ka

yahan to sab ke hain ham-piyala-o-ham-niwala

abhi talak jo nahin kisi ka to main usi ka

baDa hai qad aap ka main adna mu'af kije

milega koi barabari ka to main usi ka

ana ke ghar se nikal ke bahar meri taraf jo

baDhaega hath dosti ka to main usi ka

udasiyon ke hain ghup andhere 'anis' dil mein

daricha khole jo raushni ka to main usi ka