sabhi ke sine mein dil ke bajae patthar hai

sabhī ke siine meñ dil ke bajā.e patthar hai

zarā sañbhal ke yahāñ har qadam pe Thokar hai

use nazar nahīñ aate uyuub apne hī

vo shaḳhs maanā huā ek ā.ina-gar hai

chhupā.e baiThī hai kitne hī raaz siine meñ

hamārī zaat bhī jaise koī samundar hai

tumhāre jism kī ḳhushbū basī hai sāñsoñ meñ

vajūd jis se abhī tak mirā mo.attar hai

tumhārā tarz-e-takallum bahut latīf sahī

tumhārī baat meñ poshīda tīr-o-nashtar hai

ba-roz-e-hashr maiñ kyā muñh dikhā.ūñgā us ko

na jaane kitne gunāhoñ kā bojh sar par hai

sabhi ke sine mein dil ke bajae patthar hai

zara sanbhal ke yahan har qadam pe Thokar hai

use nazar nahin aate uyub apne hi

wo shaKHs mana hua ek aaina-gar hai

chhupae baiThi hai kitne hi raaz sine mein

hamari zat bhi jaise koi samundar hai

tumhaare jism ki KHushbu basi hai sanson mein

wajud jis se abhi tak mera moattar hai

tumhaara tarz-e-takallum bahut latif sahi

tumhaari baat mein poshida tir-o-nashtar hai

ba-roz-e-hashr main kya munh dikhaunga us ko

na jaane kitne gunahon ka bojh sar par hai