sabr kar sabr dil-e-zar ye wahshat kya hai

sabr kar sabr dil-e-zār ye vahshat kyā hai

dasht-e-pur-ḳhār meñ jaane kī zarūrat kyā hai

ik tahayyur meñ paḌā huuñ nahīñ miltā hai pata

chashm-e-be-ḳhvāb meñ ye sūrat-e-hasrat kyā hai

dil meñ baiThe haiñ to phir muñh kā chhupānā kaisā

ai but-e-hosh-rubā aap kī aadat kyā hai

loriyāñ degī qazā chain se so jā.eñge

tere bīmār ko marne kī zarūrat kyā hai

nek-o-bad jab tirī marzī pe hue haiñ mauqūf

baḳht kahte haiñ kise aur ye qismat kyā hai

dam-e-āḳhir hai mirā tum sar-e-bālīñ aao

ek saa.at ke Thaharne meñ qabāhat kyā hai

roz-e-ishrat meñ samajhtī huuñ 'jamīla' is ko

log kis vāste Darte haiñ qayāmat kyā hai

sabr kar sabr dil-e-zar ye wahshat kya hai

dasht-e-pur-KHar mein jaane ki zarurat kya hai

ek tahayyur mein paDa hun nahin milta hai pata

chashm-e-be-KHwab mein ye surat-e-hasrat kya hai

dil mein baiThe hain to phir munh ka chhupana kaisa

ai but-e-hosh-ruba aap ki aadat kya hai

loriyan degi qaza chain se so jaenge

tere bimar ko marne ki zarurat kya hai

nek-o-bad jab teri marzi pe hue hain mauquf

baKHt kahte hain kise aur ye qismat kya hai

dam-e-aKHir hai mera tum sar-e-baalin aao

ek saat ke Thaharne mein qabahat kya hai

roz-e-ishrat mein samajhti hun 'jamila' is ko

log kis waste Darte hain qayamat kya hai