sabr mushkil tha mohabbat ka asar hone tak

sabr mushkil thā mohabbat kā asar hone tak

jaan Thahrī na dil-e-dost meñ ghar hone tak

shab-e-furqat kī bhī hone ko sahar to hogī

haañ magar ham nahīñ hone ke sahar hone tak

sahne haiñ jaur-o-sitam jhelne haiñ ranj-o-alam

yā'nī karnī hai basar 'umr basar hone tak

terā parda bhī uThā degī mirī rusvā.ī

terā parda hai mire ḳhāk-ba-sar hone tak

mutazalzal to hai muddat se nizām-e-ālam

naubat aa pahuñchī hai ab zer-o-zabar hone tak

fursat-e-mātam-e-parvāna kahāñ se aa.e

sham' ko maut se laḌnā hai sahar hone tak

ai 'vafā' mārka-e-ishq to sar kyā hogā

ho chukeñge hamīñ ye mā'rka sar hone tak

sabr mushkil tha mohabbat ka asar hone tak

jaan Thahri na dil-e-dost mein ghar hone tak

shab-e-furqat ki bhi hone ko sahar to hogi

han magar hum nahin hone ke sahar hone tak

sahne hain jaur-o-sitam jhelne hain ranj-o-alam

ya'ni karni hai basar 'umr basar hone tak

tera parda bhi uTha degi meri ruswai

tera parda hai mere KHak-ba-sar hone tak

mutazalzal to hai muddat se nizam-e-alam

naubat aa pahunchi hai ab zer-o-zabar hone tak

fursat-e-matam-e-parwana kahan se aae

sham' ko maut se laDna hai sahar hone tak

ai 'wafa' marka-e-ishq to sar kya hoga

ho chukenge hamin ye ma'rka sar hone tak